NRK har fortald historia til åleinefaren Edvin Bolstad, som opplevde at tre av barna i tur og orden blei henta frå heimen deira i Samnanger.
Ei omfattande gransking av tre barnevernssaker slår fast at barnevernet ikkje undersøkte godt nok før dei tok barna frå han.
Seksuelle overgrep, vald og medisinbruk
Kommunen vurderer no å saksøka sine tidlegare tilsette.
Politikarane har også vedtatt å publisera heile rapporten på sine nettsider.
Den omtalar mellom anna påstandar om seksuelle overgrep, vald, diagnosar, samlivsbrot, medisinbruk og opphald på institusjon.
Men nokre dagar etter vedtaket i førre veke kom telefonen frå Fylkesmannen.
Ei bekymringsmelding frå Bufdir bidrog til at Fylkesmannen kravde lovlegkontroll.
– Dette er veldig personsensitive opplysingar. Det kan vera i alle si interesse at det blir gjort ei vurdering av om ei slik publisering er rett eller ikkje, sa assisterande fylkesmann Gunnar O. Hæreid til NRK fredag.
Stiller seg undrande
I tillegg kravde Fylkesmannen at rapporten måtte fjernast til lovlegkontrollen var gjennomført.
Det nekta ordførar Knut Harald Frøland (Bygdalista).
I si tilbakemelding etterlyste ordføraren lovheimel og bad Fylkesmannen, som har ei sentral rolle i barnevernssaker, vurdera sin eigen habilitet.
– Heile rapporten er anonymisert. Dette er dessutan ein sluttrapport. Delrapporten, som er bygd opp på same måte, har lege ute sidan i fjor. Eg stiller meg undrande til spørsmålet rundt denne, seier Frøland til NRK.
ADVOKAT: John Christian Elden er engasjert av Samnanger kommune.
Foto: Terje Pedersen / NTB scanpix– Vern av barnevernets dårlege arbeid
No har advokat John Christian Elden svart Fylkesmannen.
Advokaten har fått oppdraget med å vurdera om tilsette i kommunen kan stillast ansvarleg for barnevernssakene.
– Det er naturleg å bruka Elden når me først hadde eit engasjement med han. Det heng litt saman med det andre han no vurderer, seier Frøland om at Elden har fått oppdraget.
I eit brev sendt Fylkesmannen tysdag viser Elden til at «adgangen til å kreve avpublisert offentlig tilgjengelige opplysninger, er (...) svært begrenset».
ASSISTERANDE FYLKESMANN: Gunnar O. Hæreid, assisterande fylkesmann i Vestland, bad personleg om å setja i verk lovlegkontroll av vedtaket i Samnanger.
Foto: Kaia Viki / NRKAdvokaten viser elles til svar frå granskarane.
Dei meiner at anonymiseringa må vurderast som tilstrekkeleg utanfor Samnanger kommune. Det ville ikkje vera råd å anonymisera rapporten i ein slik grad at ingen i Samnanger kunne tenka seg til kven rapporten gjaldt, meiner dei.
Då måtte i så fall heile rapporten unntakast.
«Resultatet ville bli vern av barnevernets dårlige arbeid», skriv granskarane i brevet NRK har fått innsyn i.
Elden ber også Fylkesmannen om å oppgi bakgrunnen for at assisterande fylkesmann sjølve sette i verk lovlegkontrollen.
ØNSKJER OFFENTLEGGJERING: Brørne Stian Kviteberg Bolstad (t.v.) og Aleksander Bolstad ønskjer at rapporten skal offentleggjerast. – Det er tøft og vondt å lesa, men håpet er at den kan vera ein augeopnar for andre, seier Stian Bolstad.
– Offera ønskjer publisering
Assisterande fylkesmann Gunnar O. Hæreid seier Fylkesmannen i Vestland vil vurdera merknadene frå kommunen grundig.
– Me prioriterer saka og håpar å kunne konkludera i løpet av veka.
Vedtaket om å ta rapporten ned står ved lag.
Dermed ligg rapporten ute mot Fylkesmannen si klare befaling.
– Her har rapporten først blitt offentleggjort, så har me bede dei ta den ned medan saka blir vurdert. Me registrerer at kommunen er usamd i det.
– Kva konsekvensar får det at kommunen ikkje gjer som Fylkesmannen seier?
– Det får ingen direkte konsekvensar no. Me prioriterer som sagt saka, seier assisterande fylkesmann Hæreid.
For ordføraren er saka prinsipiell.
– Dei omtalte har sagt at dei ønskjer publisering. Eg meiner det er viktig for alle at me får synleggjort kva som har skjedd her, seier Knut Harald Frøland.
